Pokistonda birinchi marta tuyaga sun’iy oyoq o‘rnatildi
Pokistonning Sind viloyatida joylashgan hayvonlar boshpanasida Kemmi laqabli tuyaga birinchi marta sun’iy oyoq o‘rnatildi. Bu haqida Zamin.uz xabar berdi.
Bu mamlakat tarixida yirik hayvonga protez o‘rnatilishining ilk amaliyoti sifatida muhim voqea bo‘ldi. 2024-yil iyun oyida Kemmining oyog‘i mahalliy yer egasi tomonidan kesib tashlangan.
Buning sababi tuyani yer egasining dalasiga kirib ketgani uchun shafqatsizlarcha jarohatlashidir. Ushbu holat ijtimoiy tarmoqlarda keng tarqalib, jamoatchilik orasida qattiq norozilikka sabab bo‘ldi.
Rasmiylar voqeani nazoratga olib, tuyani Karachidagi CDRS boshpanasiga olib bordilar. Mutaxassislarning ta’kidlashicha, tuya ruhiy zarba olgan, ayniqsa, erkaklardan qo‘rqib qolgan.
Boshpana rahbari Shima Xon Kemmining yig‘lab, yurakni ezadigan nola chiqarishini eslaydi. Reabilitatsiya jarayoni murakkab kechdi.
Kemmi boshqa tuya Kelli bilan tanishtirilib, ular birga vaqt o‘tkazishdi. Bu unga uch oyog‘ida turishga harakat qilishga yordam berdi va holati sezilarli yaxshilandi.
Dastlabki davolashdan so‘ng Kemmi uchun AQShda maxsus protez buyurtma qilindi. Sun’iy oyoq o‘rnatilgach, tuya ilk qadamlarini tashladi.
Veterinar Babar Husaynning aytishicha, Kemmi hali to‘liq moslashmagan, ammo har kuni 15-20 daqiqalik mashg‘ulotlar orqali asta-sekin protezga o‘rganmoqda. To‘liq moslashuv jarayoni taxminan 2-3 hafta davom etadi.
Pokistondagi bu birinchi amaliyot mamlakat veterinariya va hayvonlarni himoya qilish sohasida muhim qadam bo‘ldi. Kemmi hozirda Karachidagi boshpanada yashamoqda va unga doimiy tibbiy, ijtimoiy hamda reabilitatsiya yordami ko‘rsatilmoqda.
Mutaxassislar bu holat hayvonlarga nisbatan zo‘ravonlikka qarshi kurashishda va nogiron hayvonlarga yordam berishda ijobiy natijalar uchun asos bo‘lishini ta’kidlamoqda.
