Braziliyada Ledi Gaga konsertida dahshatli teraktning oldi olindi: tafsilotlar oshkor qilindi
Braziliya politsiyasi amerikalik mashhur qo‘shiqchi Ledi Gaganing 3 may, yakshanba kuni Rio-de-Janeyrodagi dunyoga mashhur Kopakabana plyajida bo‘lib o‘tgan bepul konsertida dahshatli teraktni barvaqt aniqlab, uning oldini oldi. Bu haqda mamlakatning huquq-tartibot organlari matbuot xizmati xabar berdi.
Qayd etilishicha, huquqni muhofaza qilish idoralari tomonidan o‘tkazilgan keng qamrovli amaliyot davomida portlovchi moddalar hamda molotov kokteyllari orqali teraktni amalga oshirishni rejalashtirgan guruhning ikki a’zosi ushlandi. Ulardan biri asosiy uyushturuvchi sifatida Rio Grande-du-Sul shtatida noqonuniy o‘qotar qurol saqlagani uchun qo‘lga tushgan bo‘lsa, ikkinchisi Rio-de-Janeyroda bolalar pornografiyasini tarqatish va saqlash bilan shug‘ullanganlikda gumon qilinib hibsga olingan.
Politsiyaning taftish ishlarida ma’lum bo‘lishicha, ushbu xavfli to‘da o‘smir yoshlarni radikal g‘oyalarga jalb qilib, ularni nafrat va zo‘ravonlikka chorlagan. Tashkilotchilar maxsus ijtimoiy tarmoqlardagi guruhlarda o‘zlarini xonandaning xalqaro muxlislari bo‘lgan "Little Monsters" guruhi a’zolari sifatida tanishtirib, ko‘plab yoshlarni o‘z safiga jalb qilgan.
Braziliya ommaviy axborot vositalari ma’lumotiga ko‘ra, politsiya ushbu xavfli guruhning ijtimoiy tarmoqlardagi yozishmalarini kuzatib borgan va bu orqali ularning rejalarini barvaqt fosh etishga muvaffaq bo‘lgan.
Taniqli xonanda Ledi Gaganing Kopakabana sohilidagi bepul konserti nafaqat Braziliya, balki butun Janubiy Amerika madaniy hayotidagi muhim voqealardan biriga aylandi. Xonandaning o‘zi ijtimoiy tarmoqlardagi sahifalari orqali ma’lum qilishicha, tadbirga 2 milliondan ortiq muxlis tashrif buyurgan va bu uning faoliyatidagi eng ko‘p tomoshabin to‘plangan konsertlardan biri bo‘lgan.
Mahalliy hokimiyatlar ushbu yirik tadbirni tashkil etish uchun katta mablag‘ ajratib, konsert shahar iqtisodiyotini rivojlantirish va turistlar oqimini kuchaytirishga xizmat qilishini ko‘zlagan. Hisob-kitoblarga ko‘ra, tadbir natijasida shahar iqtisodiyotiga 100 million dollar atrofida daromad kelib tushishi kutilmoqda.
Politsiyaning muvaffaqiyatli amaliyoti sababli, yirik fojianing oldi olingani keng jamoatchilik va ommaviy axborot vositalarida alohida e’tirof etilmoqda. Hozirda voqea yuzasidan qo‘shimcha surishtiruv va tergov harakatlari davom ettirilmoqda.
Xonanda ham, tadbir tashkilotchilari ham, Braziliya hukumati ham bu amaliyotni amalga oshirgan huquqni muhofaza qilish organlariga o‘z minnatdorchiligini bildirdi. Ledi Gaga esa o‘z sahifalarida konsertda ishtirok etgan barcha muxlislariga salomatlik va tinchlik tilab, bunday voqealarning sodir bo‘lmasligini umid qilishini ma’lum qildi.
