Pokiston mudofaa vaziri Xavaja Muhammad Asif mamlakatning Hindiston bilan munosabatlari shunday keskinlashdiki, keng ko‘lamli harbiy harakatlarni boshlashdan boshqa chora qolmaganini ma’lum qildi.
“Biz uchun endilikda urush qilishdan boshqa variant qolmadi. Ularga xuddi shunday tarzda va keskin javob berishimiz lozim”, – dedi vazir Pokistonning milliy telekanallaridan biridagi intervyuda.
Jurnalist tomonidan urushning bo‘lishi qanchalik aniqligi haqida berilgan savolga, mudofaa vaziri qat’iyat bilan: “Albatta, urushdan boshqa chora qolmagan. Bunda shubhaga o‘rin yo‘q”, – deya javob berdi.
Eslatib o‘tamiz, 8 may kuni Pokiston va Hindiston zamonaviy aviatsiya tarixidagi eng keng ko‘lamli va eng uzoq davom etgan havo janglaridan birini o‘tkazdi. Bu jangda 25 ta jangovar samolyot ishtirok etdi va bu keskin havo kurashi bir soatdan ziyod vaqt davom etdi. Tomonlardan hech biri o‘z havo hududini buzib o‘tmagan, zarbalar esa 160 kilometrdan ortiq masofadan amalga oshirilgan.
Pokiston xavfsizlik xizmatining CNN bilan muloqot qilgan yuqori lavozimli manbasi 2019 yildan keyin har ikki tomon ham bir-birining havo hududlariga nisbatan ehtiyotkorona yondashishga o‘tganini ta’kidladi. 2019 yilda Pokiston tomonidan hindlarning MiG-21 rusumidagi qiruvchi samolyoti urib tushirilgan edi.
“Shundan beri hech qaysi tomon yana tahqirlanishni istamaydi”, – dedi manba.
Hozirgi jangda ham har ikki mamlakat o‘z havo hududida qolgan holda, uzoq masofadan “havo-havo” raketalari bilan bir-biriga zarba bergan. Bu holat ikki davlat o‘rtasidagi vaziyatning naqadar keskinligini va ehtiyotkorlik darajasining yuqori ekanligini ko‘rsatmoqda.
