AQSH prezidenti Donald Tramp Rossiya bilan tinchlik kelishuvi doirasida Ukraina «imkon qadar ko‘proq» hududlarni qaytarib olishi kerakligini ta’kidladi.
Biroq, siyosatchining fikriga ko‘ra, Kiyev NATOga a’zo bo‘lishga urinmasligi lozim, chunki bu «hammasining boshlanishiga sabab bo‘lgan», dedi Tramp.
Tramp Rossiya prezidenti Vladimir Putinni «juda aqlli inson» deb ta’rifladi, ammo shu bilan birga, Amerika siyosatchisi Rossiya yetakchisi «yon bosishga tayyor» ekanligiga ishonch bildirdi.
Kabinet yig‘ilishidagi chiqishida Tramp AQSH «har ikki taraf uchun eng yaxshi kelishuvni ta’minlash uchun barcha imkoniyatlarni ishga solishini» ta’kidladi.
«Ukraina borasida esa – biz ularning imkoni boricha ko‘proq hududlarini qaytarib olishi uchun qattiq harakat qilamiz», – deb uning so‘zlarini OAV keltirdi.
Qaysi hududlar Ukrainaga qaytarilishi mumkinligi aniqlashtirilmagan.
Eslatib o‘tamiz, referendum natijalariga ko‘ra, Donetsk va Lugansk xalq respublikalari, shuningdek, Xerson va Zaporoje viloyatlari Rossiya tarkibiga kirgan.
Ukrainaning NATOga qo‘shilish istiqbollari haqida gapirar ekan, Tramp bu niyat kam samarali ekanini ta’kidladi.
«Men shunday deya olamanki, NATO haqida unutish mumkin. Menimcha, bu – ehtimol, barchasining boshlanishiga sabab bo‘lgan», – dedi u.
Uning so‘zlariga ko‘ra, eng qiyin masala – tinchlik kelishuvi bo‘ladi, eng osoni esa Ukrainada tinchlikparvar kuchlarning mavjudligi haqida qaror chiqarishdir.
Tramp avval tinchlik kelishuviga erishishga imkon berishga chaqirdi, chunki «qolganini hal qilish ancha oson bo‘ladi». U Rossiya prezidenti bilan «bitim» tuzishni taklif qildi, ammo buga ishonch bildirmadi.
«Men buni kafolatlay olmayman – bitimlarda har doim kutilmagan holatlar bo‘lishi mumkin, ammo biz kelishuvga erishamiz, deb o‘ylayman», – dedi u va Putinning yon bosishi kerakligini qo‘shimcha qildi.
Shu bilan birga, Tramp Putinni «juda aqlli va juda ayyor inson» deb hisoblashini ta’kidladi. AQSH esa Kiyev, Moskva, Pekin va Yaqin Sharq davlatlari bilan «mukammal munosabatlar» o‘rnatishni rejalashtirmoqda.
Rossiyaga qarshi sanksiyalarni bekor qilish masalasida esa, Tramp «avvalo kelishuv qanday tugalanishini ko‘rishni» xohlashini ma’lum qildi.
