Ilon Mask o‘n to‘rtinchi marta ota bo‘ldi

^{Foto: EPA}
Milliarder Ilon Mask o‘n to‘rtinchi marta ota bo‘ldi. Farzandni biznesmen asos solgan Neuralink kompaniyasining maxsus loyihalar direktori 39 yoshli Shion Zilis dunyoga keltirdi. Mask u bilan allaqachon uch farzandni tarbiyalamoqda.

Zilis oilasi kengaygani haqida 28 fevral kuni X (Twitter) sahifasida e’lon qildi. Umuman olganda, juftlikning to‘rt farzandi bor: uch yoshli egizaklar Strayder va Azur, 12 oylik Arkadiya hamda yangi chaqaloq Seldon Likurg.

Egizaklar tug‘ilishidan oldin Maskning Zilis bilan munosabatlari haqida hech qanday ma’lumot yo‘q edi. Garchi ayol bir necha yil davomida tadbirkor bilan birga ishlagan. U Neuralink kompaniyasida operatsiyalar va maxsus loyihalar bo‘yicha direktor bo‘lgan. Ushbu startap miyaga implantatsiya qilish uchun mo‘ljallangan kompyuter chiplarini ishlab chiqaradi.

Ma’lumot o‘rnida, besh oy oldin Maskning 13-farzandi haqida xabarlar tarqalgan edi. Respublikachilar partiyasi muxlisi, 26 yoshli amerikalik yozuvchi Eshli Sent-Kler milliarderdan farzand ko‘rganini ma’lum qilgandi.

Mask hozirda to‘rt ayoldan kamida 14 farzandning otasi sanaladi. Uning kanadalik yozuvchi Jastin Mask bilan nikohidan tug‘ilgan to‘ng‘ich farzandi chaqaloqlik paytida vafot etgan. Keyinchalik ular egizak va uch farzand ko‘rgan. Milliarderning xonanda Graymsdan yana uch farzandi bor. Ular orasida eng mashhur X Æ A-Xii bo‘lib, u Oq uyda ham ko‘rinish bergandi.

Maskning o‘zi bir necha bor “demografik inqiroz”ga qarshi kurashni o‘z vazifasi deb bilishini ta’kidlagan.

Aholi soni kamayishining oldini olish uchun qo‘limdan kelgan barcha ishni qilyapman, degan edi u suhbatlaridan birida.