AQSH Yevropadan 20 ming harbiysini olib chiqishi mumkin

^{Foto: AFP}
Donald Tramp ma’muriyati sobiq prezident Jo Bayden tomonidan qo‘shimcha ravishda yuborilgan 20 ming harbiyni Yevropadan olib chiqishi mumkin. Bu haqda manbalarga tayanib, The Washington Post xabar berdi.

Yanvar oyida ismi oshkor etilmagan yevropalik diplomat xuddi shunday ma’lumotlarni keltirgan edi. Fevral oyi o‘rtalarida AQSHning NATOdagi sobiq elchisi Juli Smit ham 20 ming amerikalik harbiyni olib chiqib ketish ehtimoli haqida gapirgan.

Pentagon rahbari Pit Xegset 14 fevral kuni Myunxen xavfsizlik konferensiyasi chog‘ida “Amerikaning (Yevropadagi) ishtiroki abadiy davom etadi”, deb o‘ylamaslikka chaqirgan edi. Shunga qaramay, u Yevropa qo‘shinlarining qit’adagi darajasi muhimligini ta’kidlagan.

The New York Times gazetasi yozishicha, Yevropa Ittifoqi rasmiylari Xegset bilan uchrashuvdan so‘ng AQSHning o‘n minglab harbiylari Yevropadan chiqib ketishini kuta boshlagan. Yevropa yetakchilari agar Amerika kontingentining qisqarishi haqiqatan ham sodir bo‘lsa, bu Vashington va Moskva o‘rtasidagi muzokaralar natijasi bo‘lmasligiga kafolat olishni xohlaydi.

Trampning Rossiya bilan yaqinlashishga intilishi Yevropa davlatlarini tashvishga solmoqda. Ular Vashington Moskvaning NATOni Sharqiy Yevropadan chekinishga majburlash talabini qabul qilib, Rossiya qo‘shni davlatlarini zaif holatda qoldirishidan xavotirda. Bu esa Yevropaning o‘z mudofaasini mustahkamlashga ulgurmasidan yuz berishi mumkin.

Yevropadagi AQSH qo‘shinlari soni 2022 yildan beri 75 mingdan 105 ming kishigacha bo‘lgan, ulardan 63 mingga yaqini doimiy ravishda mintaqada joylashgan. Ularning eng ko‘pi Germaniyada to‘plangan (qariyb 35 ming).

1950-1990 yillarda AQSHning Yevropadagi harbiylari soni 200-400 ming kishidan oshgan. Amerika harbiy bazalari Germaniya, Italiya, Ispaniya, Britaniya, Polsha, Ruminiya, Bolgariya, Boltiqbo‘yi va boshqa Yevropa davlatlarida mavjud.