Oʻzbekiston fuqarolari Niderlandiyaga ishga yuborilishi mumkin

^{Foto: "Dunyo" AA}
Oʻzbekiston elchisi Gʻayrat Fozilov Niderlandiyaning EuroTalents rekruting agentligi direktori va agentlik hammuassisi bilan uchrashdi. Muzokaralar chogʻida Oʻzbekistondan Niderlandiyaga ishchi kuchini jalb qilish, shuningdek, Migratsiya agentligi va EuroTalents rekruting agentligi oʻrtasida hamkorlik aloqalarini oʻrnatish masalalari muhokama qilindi.

Niderlandiyaliklar Oʻzbekiston bilan logistika va transport, qurilish va infratuzilmani rivojlantirish, texnologiya, mehmonxona biznesi va tibbiyot kabi sohalarda mehnat resurslarini jalb qilish sohasida hamkorlikni yoʻlga qoʻyishdan manfaatdor ekanini bildirdi.

EuroTalents rekruting agentligi rahbariyati Benilyuks mamlakatlaridagi kompaniyalar xorijiy ishchi kuchini faqat qonuniy asosda yollashini qayd etdi. Ta'kidlanishicha, agentlik xorijiy fuqarolarni yollash jarayonining barcha bosqichlari, jumladan, shartnomalar tuzish, ish haqi, uy-joy bilan ta'minlash va qonunchilikka rioya qilish, kadrlarga boʻlgan ehtiyojni hal etishga yaqindan koʻmaklashadi.

Uchrashuv yakunida hamkorlikning barcha tafsilotlarini muhokama qilish maqsadida Migratsiya agentligi va EuroTalents rekruting agentligi rahbariyati oʻrtasida onlayn muzokaralar oʻtkazish boʻyicha kelishuvga erishildi.