Qovun narxi iyul boshida uch barobar tushdi
O‘zbekistonda qovun narxi so‘nggi bir haftada uch barobar pasaydi, deb UPL.uz xabar berdi. Bu haqida Zamin.uz xabar berdi.
2025 yil iyul oyining birinchi haftasida qovun narxlari keskin tushdi. Bu holatning asosiy sababi Mirzacho‘l hududida hosilning ommaviy yig‘ilishi hamda Qozog‘istonda mavsumning past narxlarda boshlanishi hisoblanadi.
Toshkent ulgurji bozorlariga iyun boshida yirik qovun partiyalari kelgan bo‘lib, bu o‘tgan yilga nisbatan taxminan bir hafta oldin sodir bo‘lgan. Mavsum boshida qovun narxi o‘rtacha 6000 so‘m atrofida bo‘lgan.
2024 yilga nisbatan narxlar iyun oxirigacha barqaror saqlangani kuzatilgan, hatto iyun oyining ikkinchi yarmida narxlar o‘tgan yilga nisbatan ikki-uch baravar yuqori bo‘lgan. Biroq iyul boshida narxlar 2000 so‘mgacha tushdi.
Fresh Melon mas’uliyati cheklangan jamiyati rahbari Farhod Qorabekovning ta’kidlashicha, mavsum boshidagi narxlarning yuqori bo‘lishi bir nechta omillarga bog‘liq. Jumladan, erta va o‘rtapishar navlar uchun ekin maydonlari 30 foizga kamaygan, Surxondaryo va Jizzax viloyatlarida bahordagi anomal ob-havo hosil sifatiga salbiy ta’sir ko‘rsatgan.
Sifatli mahsulotning kamligi esa narxlarni bir oy davomida barqaror ushlab turishga olib kelgan. Iyun oxirida Mirzacho‘l hududida ommaviy terim boshlangan, shuningdek, Qozog‘istonda mavsumning boshlanishi bozordagi taklifni keskin oshirdi va narxlarning pasayishiga sabab bo‘ldi.
Qozog‘iston hosili mo‘l va sifatli bo‘lgani uchun eksport raqobati kuchaygan. Qozog‘iston eksportchilari qovunni FCA shartlari asosida O‘zbekiston ichki bozoridan 15-25 foiz arzonroq narxda taklif qilmoqda.
Yevroosiyo iqtisodiy ittifoqiga a’zo bo‘lgani sababli, Rossiya va Qirg‘izistonga eksportda boj to‘lovlari olinmaydi va tartiblar soddalashtirilgan. Bu holat O‘zbekistonning uchta asosiy eksport yo‘nalishida faoliyatni cheklab, ichki bozorda mahsulotning ortiqcha to‘planishiga olib keldi va narxlarning pasayishiga sabab bo‘ldi.
Shunga qaramay, sifatli qovun taklifi cheklanganligi va ichki talab mavjudligi narxlarni yaqin kelajakda barqarorlashishiga imkon yaratishi mumkin. Kelgusi narxlar esa hosil hajmi va eksport imkoniyatlariga bog‘liq bo‘ladi.
O‘zbekiston yiliga taxminan 150 ming tonnagacha qovun eksport qiladi. 2024 yilda mamlakat qovunni 20 dan ortiq davlatga, jumladan Rossiya, Qozog‘iston hamda Yevropa mamlakatlariga yetkazib berilgan.
