Chorshanba kuni “Liverpul” jamoasi hujumchi Ugo Ekitikeni rasmiy ravishda o‘z safiga qo‘shganini e’lon qildi. Bu haqida Euro-football.ru xabar berdi.
23 yoshli futbolchi Frankfurtning “Ayntraxt” klubidan ko‘chib o‘tgan bo‘lib, uning transfer narxi taxminan 90 million yevroni tashkil etdi. Bonuslar hisobga olinsa, bu summa 95 million yevrogacha yetishi mumkin.
Ekitike fransuz futbolchilari orasida tarixdagi oltinchi eng qimmat transferga aylanishi ma’lum qilindi. Actu Foot nashrining xabar berishicha, undan yuqori narx faqat Kilian Mbappe (“PSJ”, 180 million yevro), Usmon Dembele (“Barselona”, 135 million yevro), Antuan Grizmann (“Barselona”, 120 million yevro), Pol Pogba (“Manchester Yunayted”, 105 million yevro) va Randal Kolo-Muani (“PSJ”, 95 million yevro) uchun to‘langan.
Yangi futbolchi reytingda Uesli Fofana, Orelien Tchuameni va Lyuka Ernandez kabi futbolchilarni ortda qoldirdi. Ularning transfer qiymati 80 million yevro atrofida bo‘lgan.
Shuningdek, Ekitike Zinedin Zidanni ham ortda qoldirdi, u o‘z vaqtida Madridning “Real” klubi tomonidan 77,5 million yevroga sotib olingan edi.
