Inter Mayami futbol klubi Lionel Messining jarohati yuzasidan rasmiy bayonot berdi. Bu haqida Euro-football.ru xabar berdi.
Klub xabariga ko‘ra, Liga kubogi doirasidagi so‘nggi uchrashuvda Nekaksa jamoasiga qarshi o‘yinda Messi tizzasi orqa tomonidagi payidan jarohat oldi. Shu sababli u uchrashuvning 11-daqiqasida zaxiraga olindi.
Klub rasmiy saytida ma’lum qilinishicha, Messi to‘liq tibbiy ko‘rikdan o‘tkazildi. Tekshiruv natijalariga ko‘ra, uning o‘ng oyog‘ida kichik mushak shikastlanishi aniqlangan.
Futbolchining safga qaytish sanasi uning sog‘ayish jarayoniga bog‘liq bo‘ladi. Tiklanish muddati Messining organizmi bu jarohatga qanday javob berishiga qarab belgilanadi.
Shuningdek, Lionel Messi bir necha haftani o‘tkazib yuborishi mumkinligi aytilmoqda. Klub yaqin kunlarda futbolchining holati haqida qo‘shimcha ma’lumot beradi.
Ma’lumot uchun, 7-avgust kuni Inter Mayami Liga kubogining uchinchi turida Pumas jamoasiga qarshi maydonga tushadi. Messi ushbu bahsda ishtirok etishi yoki etmasligi hozircha noma’lum.
Klub futbolchining sog‘lig‘i ustuvor ahamiyatga egaligini ta’kidlagan.
