Taniqli murabbiy Dmitriy Cheryshev “Rostov” jamoasining bosh murabbiyi lavozimiga Jonatan Alba tayinlangani yuzasidan o‘z fikrini bildirdi. Bu haqida Euro-football.ru xabar berdi.
Ma’lumki, aynan Alba joriy yil fevral oyida “sariq-ko‘klar”ni boshqargan edi. O‘sha vaqtda Valeriy Karpin kutilmaganda, mavsum qayta boshlanishidan bir necha kun oldin klubni tark etgan edi.
Cheryshevning fikriga ko‘ra, “Rostov” rahbariyati Alba nomzodini tanlashda xato qilgan. U Jonatan Albaning ilgari hech qayerda murabbiy sifatida faoliyat yuritmaganini, futbolchi bo‘lib o‘ynamaganini, asosan tahlilchi sifatida ishlaganini ta’kidladi.
Shu sababli, Cheryshev “Rostov”ning uni bosh murabbiy etib tayinlashini tushunmasligini aytdi. Yangi mavsum boshida “Rostov” jamoasi uchta o‘yinda ham mag‘lub bo‘ldi.
Jamoa “Zenit”ga 1:2, “Dinamo”ga 0:1 va “Krilya Sovetov”ga 1:4 hisobida yutqazdi. Hozirda Jonatan Alba boshchiligidagi “Rostov” turnir jadvalida 14-o‘rinda bormoqda.
Keyingi turda “Rostov” o‘z maydonida “Pari NN” jamoasini qabul qiladi. Klub rahbariyatining ushbu qarori muxlislar va mutaxassislar orasida turli fikrlar paydo bo‘lishiga sabab bo‘ldi.
