Ter Shtegen tibbiy xulosani nima uchun imzolamadi?

Mark-Andre ter Shtegen yaqinda orqa umurtqa sohasidagi muammolar sababli operatsiya qildirdi. Bu haqida Euro-football.ru xabar berdi.

Barselona klubi shifokorlari germaniyalik darvozabon to‘liq sog‘ayib ketishi uchun kamida to‘rt oy vaqt kerak bo‘ladi, deb hisoblamoqda. Klub La Liga rahbariyatidan ushbu jarohatni uzoq muddatli deb tan olishni so‘ramoqchi.

Agar bu talab qanoatlantirilsa, Barselona ter Shtegenning maoshining bir qismini boshqa futbolchini ro‘yxatdan o‘tkazish uchun ishlatishi mumkin bo‘ladi. Shu bilan birga, ter Shtegen klubga tibbiy xulosa imzolashdan bosh tortdi.

Cadena SER nashrining xabariga ko‘ra, ter Shtegen bu qarorni klubga nisbatan norozilik sifatida emas, balki boshqa sababga ko‘ra qabul qilgan. Darvozabon o‘zining tiklanishi ikki-uch oy davom etadi, deb hisoblaydi.

Barselona esa bu jarohat avvalgisi takrorlanishi bo‘lishi mumkinligini, to‘liq sog‘ayish uchun to‘rt besh oy kerak bo‘lishini ta’kidlamoqda. Eslatib o‘tamiz, Barselona vaqtincha ter Shtegenni sardorlik bog‘ichidan mahrum qilgan.