Dortmundning "Borussiya" klubi hujumchisi Karim Adeyemi bolaligida "Bavariya" jamoasini qo‘llab-quvvatlaganini tan oldi. Bu haqida Euro-football.ru xabar berdi.
Germaniyalik futbolchi 2010-2011 yillarda Myunxen klubining akademiyasida tahsil olgan. Uning so‘zlariga ko‘ra, bolaligida "Bavariya" safida o‘ynagan va klub hamda Arjen Robbenning ashaddiy muxlisi bo‘lgan.
Biroq, yosh ulg‘aygani sari "Borussiya" klubining kamtar imkoniyatlarga qaramasdan sovrinlar uchun kurashishini qadrlay boshlagan. Adeyemi, shuningdek, Dortmund klubining fidokor muxlislari va klubda har doim yaxshi futbolchilar bo‘lganini alohida ta’kidladi.
Hozirda u "Borussiya" safida har bir daqiqadan zavqlanayotganini bildirib, aynan shu sababdan klubga o‘tishga qaror qilganini aytdi. Karim Adeyemi 2022 yilda "Red Bull Zalsburg" jamoasidan Dortmundga kelib qo‘shilgan va hozirda "Borussiya" safida faoliyatini davom ettirmoqda.
