"Liverpul" futbol klubi hujumchisi Muhammad Saloh yaqinda Yevropa futbol uyushmalari ittifoqi tomonidan e’lon qilingan bayonotga o‘z munosabatini bildirdi. Bu haqida Euro-football.ru xabar berdi.
Ushbu bayonot sobiq Falastin terma jamoasi yarim himoyachisi Sulaymon al-Obeydning fojiali o‘limiga bag‘ishlangan edi. 6-avgust kuni Sulaymon al-Obeyd Isroil tomonidan uyushtirilgan hujumlardan birida halok bo‘lgani haqida xabar tarqaldi.
Yevropa futbol uyushmalari ittifoqi rasmiy murojaatida futbolchini "falastinlik Pele" deb atab, uning Falastin futboli va yosh avlod uchun qanday ilhom manbai bo‘lganini ta’kidladi. Muhammad Saloh ushbu e’lonni ijtimoiy tarmoqlarda bo‘lishib, Yevropa futbol uyushmalaridan futbolchining o‘limi sabablari va tafsilotlari yuzasidan aniq ma’lumot berishni so‘radi.
U o‘z murojaatida Sulaymon al-Obeydning qayerda, qanday va nima sababdan halok bo‘lganini ochiqlashni so‘radi. Sulaymon al-Obeyd o‘z faoliyati davomida Falastin chempionatida o‘ynagan va mamlakat terma jamoasi safida 24 ta uchrashuvda maydonga tushgan.
Uning vafoti futbol olamida katta qayg‘u bilan qabul qilindi.
