«Manchester Siti» klubining hujumkor yarim himoyachisi Jek Grilish «Everton» jamoasiga ijaraga berilishi kutilmoqda. Bu haqida Euro-football.ru xabar berdi.
«Everton» tez orada 29 yoshli futbolchini o‘z tarkibiga qo‘shib olganini rasman e’lon qilishi mumkin. Grilish yaqinda «Manchester Siti» asosiy tarkibidan chiqarib yuborilgan edi.
Tomonlar o‘rtasidagi kelishuvga ko‘ra, «Everton» futbolchini keyinchalik to‘liq sotib olish huquqiga ham ega bo‘ladi. Mail Sport xabariga ko‘ra, «Everton» bosh murabbiyi Devid Moyes Jek Grilishga doimiy o‘yin amaliyoti uchun imkoniyat yaratib beradi va agar u o‘zini ko‘rsata olsa, Angliya terma jamoasi safida 2026 yilgi jahon chempionatida ishtirok etish uchun kurashib ko‘rishi mumkinligini aytgan.
Grilishning o‘zi ham «Everton» safiga o‘tishni juda xohlagan va bu transfer amalga oshishi uchun barcha harakatlarni qilgan. Jek Grilish sentabr oyida 30 yoshga to‘ladi.
Uning «Manchester Siti» bilan tuzgan shartnomasi 2027 yilning o‘rtalariga qadar amal qiladi.
