Manchester Yunayted Mark Gehi uchun rasmiy so‘rov yubordi
«Kristal Pelas» futbol klubi markaziy himoyachisi Mark Gehi Angliya Premer-ligasining yana bir yirik jamoasining e’tiboriga tushdi. Bu haqida Euro-football.ru xabar berdi.
Yaqinda klub rahbariyati 25 yoshli futbolchini sotishga majbur bo‘lishini tasdiqladi. Sababi, uning amaldagi shartnomasi kelasi yili yakunlanadi va uni bepul qo‘yib yubormaslik uchun klub uni yozgi transfer oynasida sotishni rejalashtirmoqda.
Ma’lumotlarga ko‘ra, taniqli jurnalist Stiv Key xabar berganidek, «Manchester Yunayted» klubi Mark Gehi bo‘yicha rasmiy so‘rov yuborgan. Biroq, ushbu futbolchi uchun asosiy raqobatchi sifatida «Liverpul» ko‘rilmoqda.
«Liverpul» ham futbolchini o‘z safida ko‘rishni istamoqda va transfer uchun kurash kuchaygan. Transfermarkt portalida Mark Gehining bahosi 45 million yevroga teng deb ko‘rsatilgan.
Markaziy himoyachi yaqinda «Kristal Pelas» tarkibida Angliya Superkubogi finalida aynan «Liverpul» ustidan g‘alaba qozonishda ham muhim rol o‘ynadi. Shu sababli, unga bo‘lgan qiziqish ortib bormoqda va yozgi transfer oynasida uning yangi jamoaga o‘tishi kutilmoqda.
