Norin hokimi konteyner uyda yashashni boshladi

Namangan viloyatining Norin tumanida Prezident Shavkat Mirziyoyevning tanqididan so‘ng tuman hokimi Jo‘rabek Nurmatov muhim qaror qabul qildi. Bu haqda Zamin.uz xabar berdi.

U aholi bilan yaqindan muloqotda bo‘lish va muammolarni joyida hal etish maqsadida Sho‘rariq mahallasida o‘rnatilgan konteyner uyda yashashni boshladi. Bu haqda viloyat hokimligi matbuot xizmati ma’lum qildi.

Prezident Mirziyoyevning 16-17 sentyabr kunlari Namangan viloyatiga amaliy tashrifi hududda yangi davrni boshlab berdi. Viloyat hokimi Shavkatjon Abdurazzoqov rahbarligida tegishli mutasaddilar mahallani yangilash, infratuzilmani rivojlantirish va aholi turmush darajasini oshirish bo‘yicha keng ko‘lamli ishlarni boshladi.

Dastlabki uchrashuvlarda mahallada bo‘sh turgan binolar o‘rnida sanoat zonasi tashkil etish, yangi ish o‘rinlari yaratish, yo‘l va infratuzilmani tubdan yangilash rejalari muhokama qilindi. Yangi Namangan va atrofdagi olti mahallaning barqaror rivojlanishi uchun master reja ishlab chiqish jarayoni yo‘lga qo‘yildi.

Bu ishlarni muvofiqlashtirish maqsadida maxsus viloyat shtabi tashkil etildi. Prezident tashrifi mahallaning haqiqiy holatini ochib berdi.

Hududda besh mingdan ortiq aholi istiqomat qiladi, ulardan 62 tasi kam ta’minlangan oila, 118 nafari ishsiz, 157 nafari mehnat migratsiyasida bo‘lgan fuqarolar hisoblanadi. Davlat rahbari chang bosgan ko‘chalar va bo‘sh binolarni ko‘zdan kechirib, aholi fikrlarini tingladi va mutasaddilarga qat’iy ko‘rsatmalar berdi.

U hatto tuman hokimi zarur bo‘lsa shu yerda yotib qolishi kerakligini ta’kidlagan edi. Shundan so‘ng Norin tumani hokimining konteyner uyga ko‘chib kirishi uning ishga mas’uliyat bilan yondashuvining amaliy ko‘rinishi sifatida baholanmoqda.

Mutaxassislar bu qaror mahalladagi islohotlarni tezlashtirish, muammolarni joyida hal etish va aholi bilan doimiy muloqot o‘rnatish imkonini yaratishini ta’kidlashmoqda. Hokimning konteyner uydagi yashashi davlat rahbarining mas’ul shaxslar xalqqa yaqin bo‘lishi lozim degan talabining amalda ifodasi sifatida qabul qilinmoqda.

(Manba: Zamin.uz)