Urugvaylik hujumchi Darvin Nunyes Saudiya Arabistonining "Al Hilol" jamoasiga o‘tishga yaqin turibdi. Bu haqida Euro-football.ru xabar berdi.
Mashhur futbol jurnalisti Fabrizio Romano bergan ma’lumotga ko‘ra, Nunyes yangi klub bilan uch yilga, ya’ni 2028 yilning yozigacha shartnoma imzolaydi. Ma’lum bo‘lishicha, Darvin Nunyes Saudiya Arabistonida uch mavsum davomida jami 66 million yevro maosh oladi.
Bu miqdor uning "Liverpul" jamoasida olgan daromadidan ancha yuqori. Avvalroq, Saudiya klubi "Liverpul"ga futbolchi uchun 53 million yevro to‘lashga kelishib olgani haqida xabar tarqalgan edi.
Bu mablag‘ bonuslarni hisobga olmagan holda belgilanmoqda. Eslatib o‘tamiz, Darvin Nunyes 2022 yildan beri "Liverpul" safida to‘p suradi.
Hujumchi hozirda 26 yoshda. U Angliya klubi tarkibida jami 143 o‘yinda maydonga tushib, 40 ta gol urgan.
O‘tgan mavsumda esa "Liverpul" bilan Angliya chempioni bo‘ldi. Shuningdek, "Liverpul" Nunyesni Portugaliyaning "Benfika" klubidan 85 million yevroga sotib olgan edi.
Shu tariqa, Darvin Nunyes faoliyatida yangi bosqich boshlanishi kutilmoqda.
