Ter Shtegen Barselona sardori maqomini yana qaytarib oldi
Barselona futbol klubi darvozaboni Mark-Andre ter Shtegen jamoa sardori sifatida o‘z lavozimini saqlab qoldi. Bu haqida Euro-football.ru xabar berdi.
Klub rasmiy sayti xabariga ko‘ra, avvalroq 33 yoshli futbolchining sardorlik maqomi vaqtincha to‘xtatilgan edi. Bu qaror uning uzoq muddatli jarohatiga oid tibbiy xulosani imzolashdan bosh tortgani bilan bog‘liq bo‘lgan.
Keyinchalik, klub va futbolchi o‘rtasida kelishuvga erishildi va ter Shtegen zarur hujjatni imzoladi. Natijada Barselona klubi ushbu tibbiy xulosani La Liga rahbariyatiga taqdim etishi mumkin bo‘ldi.
Klub bildirgan bayonotga ko‘ra, intizomiy ish yopildi va futbolchiga sardorlik maqomi qayta berildi. Ma’lumot uchun, 7 avgust kuni Barselona jamoasida vaqtincha sardorlik vazifasi markaziy himoyachi Ronald Arauxoga topshirilgan edi.
Hozirda esa Mark-Andre ter Shtegen yana jamoa sardori sifatida faoliyatini davom ettiradi. Klub rahbariyati va futbolchi o‘rtasida yuzaga kelgan tushunmovchilik ijobiy hal etildi.
