Ispaniyada murabbiylar videoyordam so‘rash huquqiga ega bo‘ldi

Ispaniya ayollar futbolida yangi yengillashtirilgan VAR tizimi sinovdan o‘tkazilmoqda. Bu haqida Euro-football.ru xabar berdi.

Ushbu tizim Football Video Support deb ataladi va u avvalgi VAR tizimiga o‘xshash vazifalarni bajaradi. Biroq, bu tizimda video takrorlarni ko‘rib chiqish tashabbusi hakam tomonidan emas, balki jamoa murabbiylari tomonidan amalga oshiriladi.

Ya’ni, murabbiylar muayyan vaziyatlarda videoyordamga murojaat qilishlari mumkin. Shunga qaramay, yakuniy qarorlarni maydondagi bosh hakam qabul qiladi.

Yangi tizim to‘rt asosiy tamoyil asosida ishlaydi. Bular quyidagilar: to‘p darvozadan o‘tdimi yoki yo‘qmi holatini aniqlash, penalti belgilash yoki rad etish, o‘yinchining ofsaydda turgan-turmaganini aniqlash va futbolchining qoidabuzarlik darajasini (sariq yoki qizil kartochka) baholash.

Shuningdek, har bir jamoaga uchrashuv davomida faqat ikki marta, qo‘shimcha vaqtda esa yana bir marta videoyordamdan foydalanish huquqi beriladi. Bu esa o‘yinning har daqiqasida takroriy ko‘rib chiqishlar bo‘lishining oldini oladi va uchrashuv tartib-intizomda o‘tishini ta’minlaydi.

Mazkur yondashuv o‘yinning shaffof va adolatli bo‘lishiga xizmat qiladi.