Manchester Yunayted futbolchisi Markus Reshford Barselona jamoasidagi mavsumoldi tayyorgarlik haqida o‘z fikrlarini bildirdi. Bu haqida Euro-football.ru xabar berdi.
Ma’lumki, kataloniyaliklar Reshfordni sotib olish huquqi bilan ijaraga olishgan. Futbolchi jurnalistlarga bergan intervyusida Barselonadagi mashg‘ulotlar juda yuqori sur’atda o‘tayotganini ta’kidladi.
Uning so‘zlariga ko‘ra, har bir mashg‘ulotdan so‘ng charchoq sezilgan, bu esa jamoaning jiddiy tayyorgarlik olib borayotganidan dalolat beradi. Reshford, shuningdek, ob-havo sharoiti ham mashg‘ulotlarga o‘z ta’sirini o‘tkazganini aytdi.
Unga ko‘ra, yugurishning o‘zi qiyin emas, ammo to‘p bilan ishlash va doimiy yuqori darajani saqlash ko‘proq kuch va e’tibor talab qiladi. Aynan shu jihatlar Barselonadagi tayyorgarlikni murakkablashtirgan.
Markus Reshford o‘zining yangi jamoasiga tezda moslashishga harakat qilayotganini, mashg‘ulotlar esa unga katta tajriba berayotganini qayd etdi. Eslatib o‘tamiz, Barselona La Liga yangi mavsumining birinchi turida 16 avgust kuni Malorka jamoasiga qarshi maydonga tushadi.
