FIFA rahbari Infantino O‘zbekistonni mundial yo‘llanmasi bilan tabrikladi

FIFA prezidenti Janni Infantino O‘zbekiston milliy terma jamoasini 2026 yilda Kanada, Meksika va AQSH mezbonlik qiladigan Jahon chempionatiga yo‘llanma olgani munosabati bilan tabrikladi.

Infantino o‘zining rasmiy tabrigida O‘zbekistonning yillar davomida xalqaro futbolda orttirgan tajribasini, yoshlar va olimpiya terma jamoalaridagi yutuqlarini e’tirof etib, “Oq bo‘rilar”ning jahon chempionatida debyut qilishi butun futbol olami uchun katta voqea ekanini ta’kidladi.

"O‘zbekiston, FIFA Jahon chempionatiga xush kelibsiz!" — deb boshladi o‘z tabrig‘ini Infantino.

“Sizni 2026 yilda Kanada, Meksika va AQSHda bo‘lib o‘tadigan mundialga tarixiy yo‘llanmani qo‘lga kiritganingiz bilan chin dildan muborakbod etaman.

O‘zbekiston 1994 yildan buyon FIFA a’zosi sifatida yoshlar o‘rtasidagi bir qator musobaqalarda va Olimpiya o‘yinlarida munosib qatnashib kelmoqda. Endi esa ajoyib saralash natijalari orqali sizning milliy termangiz haqli ravishda katta sahnada o‘z o‘rniga ega chiqdi.

Millionlab muxlislar 'Oq bo‘rilar'ning Jahon chempionatidagi ilk qadamlarini katta intizorlik bilan kutmoqda”, — deyiladi tabrik maktubida.

E’tiborli nuqta: tarixiy debyut

O‘zbekiston milliy terma jamoasi o‘z tarixida birinchi marta Jahon chempionati final bosqichiga chiqishga muvaffaq bo‘ldi. Mazkur yutuq nafaqat sport, balki mamlakat nufuzi va futbolning ommaviylashuvi nuqtayi nazaridan ham katta ahamiyatga ega.

Infantinoning shaxsan yo‘llagan tabrigi esa O‘zbekistonning xalqaro miqyosdagi e’tirofini yanada mustahkamlaydi.

O‘zbekiston futbol tarixida yangi sahifa ochildi. Endi "Oq bo‘rilar"ni nafaqat Osiyo maydonlarida, balki Jahon chempionatida — futbolning eng oliy sahnasida ko‘ramiz.

Tarixiy yo‘llanma egalariga yana bir bor tabriklar! Olg‘a, O‘zbekiston!