Olimlar pitssa hidi stressni kamaytirishini aniqladi

^{Foto: Getty Images}
Sharqiy Angliya universiteti tadqiqotchilari biometrik tahlil o‘tkazib, yangi pishirilgan pitssani hidlash stress, tashvish va asabiylashishni kamaytirishini aniqladi. Bu haqda Secret NYC xabar berdi.

Tadqiqot professor Oli Bakli tomonidan o‘tkazilgan, podkaster Teo Beyker tadqiqot ishtirokchisi sifatida qatnashgan. Professor uning qon bosimi, yurak urish tezligi va terining galvantik reaksiyasi (GSR) kabi biometrik ko‘rsatkichlarini o‘lchagan.

Bu futbol o‘yinidan oldin ham, futbolning eng asabni buzadigan lahzalari paytida ham o‘tkazilgan. Bu vaqt mobaynida Beyker pitssasining xushbo‘y hididan nafas olgan.

Tadqiqot natijalari shuni ko‘rsatdiki, pishirilayotgan pitssaga yaqin joyda turganida Teo o‘yindan oldin kamroq asabiylashish belgilarini namoyon qilgan. Pitsa unga hatto tinchlantiruvchi ta’sir ko‘rsatgan.

"Teoning ikki holat — pitssasiz va pitssa bilan — reaksiyalarini baholash shuni ko‘rsatdiki, muzlatilgan pitssani pishirish va iste’mol qilish sezilarli darajada tinchlantiruvchi ta’sirga ega", deydi professor Bakli.

Keyinchalik, OnePoll kompaniyasi pishirilayotgan pitssa hidiga boshqalarning munosabatini o‘rganish uchun so‘rovnoma o‘tkazdi. Natijalar quyidagicha bo‘ldi:

• 42 foiz bu hid ularga qulaylik hissini berganini aytdi;
  
• 28 foiz bu ularning kayfiyatini ko‘targanini ta’kidladi;
  
• 17 foiz bu ularda hayajonli kutish tuyg‘usini uyg‘otganini bildirdi.
  

Cookist saytining yozishicha, pitssaning kayfiyatni ko‘tarish qobiliyatining asosiy sabablaridan biri bu — serotonin, ya’ni kayfiyat, uyqu va ishtahani boshqaradigan “baxt gormoni”dir. Muhim aminokislota hisoblangan triptofan pishloq, go‘sht va pomidor sousi kabi ko‘plab pitssa qo‘shimchalarida mavjud. Triptofan miyaga yetib borganda, u serotoninga aylanib, tinchlanish va yaxshi kayfiyat hissini oshirishga yordam beradi.