Meksikalik himoyachidan fantastik chayon goli: "Atlas"ning kambek asoschisi (video)
Meksika chempionatida muxlislarni hayratda qoldirgan ajoyib gol qayd etildi. "Atlas" klubi himoyachisi Mateus Doris nafaqat o‘zi uchun, balki jamoasi uchun ham tarixiy bo‘lgan fantastik zarba yo‘lladi. U jamoasining 0:3 hisobida ortda ketayotganida, 61-daqiqada futbol olamini lol qoldirgan gol urdi.
Tezkor burchak zarbasidan keyin raqib jarima maydonida juda og‘ir vaziyat hosil bo‘ldi. To‘p Mateus Doris tomon yo‘nalganda, u klassik “chayon zarbasi”ni bajarib, darvozaga yo‘lladi. Bu mahoratli zarbani darvozabon qaytarolmadi va hisob 3:1 ko‘rinishiga keldi.
Aynan shu goldan keyin "Atlas" futbolchilari ruhlanib ketishdi va 4:3 hisobida g‘alabani ilib ketishdi. Bu nafaqat "Atlas" uchun, balki Meksika chempionati tarixidagi eng katta kambeklardan biri bo‘lib qoldi.
Muxlislar va futbol tahlilchilari Dorisning ushbu golini mavsumning eng go‘zal urilgan to‘plaridan biri deb hisoblashmoqda. Uning bu mahoratli harakati jamoasini kuchli iroda va ruh bilan g‘alabaga yetaklaganini ta’kidlash mumkin.
Nodirbek
