Polsha bosh vaziri: «Jahon siyosatiga shafqatsizlik va xudbinlik qaytmoqda»

Polsha bosh vaziri Donald Tusk 1 may kuni televideniye orqali qilgan murojaatida dunyo siyosati og‘ir bir bosqichga kirib borayotganini alohida ta’kidladi. Uning fikricha, hozirgi global vaziyatda sobitqadamlik va aniq qadriyatlarga sodiqlik o‘rniga noaniqlik, shafqatsizlik va egoizm yana o‘z o‘rnini egallay boshlagan.

«Biz juda murakkab zamonlarga kirib keldik. Afsuski, bugungi kunda xalqaro siyosatda yana shubha-gumon, qat’iyatsizlik va o‘zgaruvchanlik hukmron bo‘lib qolmoqda. Insonparvarlik va qadriyatlarga sodiqlik o‘rnini ko‘proq shaxsiy manfaatlar va moddiy foyda ko‘rishga intilish egallayapti», — dedi Tusk.

Polsha hukumati rahbari bu vaziyatni xavotir bilan kuzatayotganini, lekin bu kabi o‘zgarishlarga qarshi kurashish lozimligini urg‘uladi. Uning ta’kidlashicha, hozirgi dunyoda qadriyatlar uchun kurashish va ularni himoya qilishda katta mas’uliyat bor.

Shuningdek, Donald Tusk o‘z chiqishida mamlakat iqtisodiyotiga ham to‘xtalib, Polsha tadbirkorlari va mahalliy ishlab chiqaruvchilar manfaatlarini himoya qilish uchun hukumat barcha zarur choralarni ko‘rishini va’da qildi.

«Biz o‘z ishlab chiqaruvchilarimiz uchun ichki bozorda eng qulay sharoitlarni yaratishga harakat qilamiz. Milliy iqtisodiyotni kuchaytirish uchun iqtisodiy millatchilikka ham e’tibor berishimiz kerak. Bu tushunchada yomon narsa yo‘q, aksincha, u bizning iqtisodiy rivojlanishimiz uchun muhim ahamiyatga ega», — deb qo‘shimcha qildi Polsha bosh vaziri.