G‘azoda gumanitar yordam karvonlari kirishi boshlandi

G‘azo sektorida yashovchi ikki milliondan ortiq aholi gumanitar tanaffus e’lon qilinishi va yordam karvonlarining kirishiga ruxsat berilishi haqidagi xabarlarga ehtiyotkorlik bilan ijobiy munosabat bildirmoqda. Bu haqida Zamin.uz xabar berdi.

Biroq ko‘plab fuqarolar bu chora vaqtinchalik bo‘lib, asosiy muammolarni hal etishga xizmat qilmasligidan xavotirda. Isroil armiyasi yakshanba kuni G‘azoga oziq-ovqat va dori-darmon yetkazib beruvchi karvonlar o‘tishi uchun gumanitar yo‘laklar ochilishini ma’lum qildi.

Bu qaror ochlik xavfi oshgani va xalqaro bosim kuchaygani sababli qabul qilindi. So‘nggi oylar ichida G‘azoda kundalik hayot deyarli to‘xtab qoldi.

Bombardimonlar, chegara yopilishi va yetkazib berish yo‘llarining uzilishi natijasida aholi oziq-ovqat, toza ichimlik suvi va dori-darmon kabi zaruriy ehtiyojlardan jiddiy qiyinchiliklarga duch kelmoqda. Isroil rasmiylari G‘azoga un, shakar va konservalangan mahsulotlardan iborat yetti paket yordamni samolyot orqali yetkazganini bildirmoqda.

Oltita farzand onasi Nivin Solih: “Bu faqat oziq-ovqat miqdori haqida emas, balki uning sifati haqida ham gap. To‘rt oydan beri yangi meva yoki sabzavot iste’mol qilmadik.

Tovuq, go‘sht, tuxum yo‘q. Faqat muddati o‘tgan konservalar va un bor”, dedi.

G‘azodagi sog‘liqni saqlash mutaxassislariga ko‘ra, ayniqsa bolalar va maxsus parhezga muhtoj shaxslar orasida oziq-ovqat yetishmovchiligi kuchaymoqda. G‘azo-Misr chegarasidagi Rafah o‘tish nuqtasida yordam yuklangan yuk mashinalari navbatda turibdi.

BMT va boshqa insonparvarlik tashkilotlari yordam yetkazilishiga hech qanday to‘siq bo‘lmasligini, yordamlar erkin kirishi lozimligini ta’kidlamoqda. Shimoliy G‘azodagi do‘kondor Ahmad Taha: “Bu doimiy yechim emas, bu saraton kasalligiga qarshi faqat og‘riq qoldiruvchi berishdek holat — muammo esa o‘z joyida qolmoqda”, dedi.

G‘azo aholisi yordam uchun minnatdor bo‘lsa-da, barqaror va tinchlikka olib boruvchi siyosiy yechimni intiqlik bilan kutmoqda.